دليلك للاستحمام بسهولة في الشتاء

كم مرّة فكرتِ في قرار الاستحمام لكن تراجعتِ بمجرد النظر للبلكونة وسماع صوت المطر أو حتي رؤية مؤشر درجة الحرارة  في الموبيل أو التليفزيون؟
البطانية والـ20 طبقة ملابس مع الأكل والمشروبات الدافية، تضحيات مش سهل الاستغناء عنها في الشتاء دفعة واحدة والاتجاه للدش، سواء لكِ أو لطفلك.

لذلك، ولإنه قرر صعب علينا جميعًا، فإليكِ بعض النصائح اللي هتساعدك على الاستحمام بسهولة في الشتا، أو على الأقل دون الشعور بالذنب في التخلي على الدفا والتوجه بكامل إرادتك للحمام.

- اتأكدي من تدفئة المنزل أو الغرفة كويس جدًا قبل الاستحمام، مفاجأة الشباك المفتوح في البرد -لأي سبب- مش مفاجأة سعيدة بعد الدش.
2- خلصي كل ترتيبات المنزل، مواعينك، غسيلك، الطبخ، ولمّ الغسيل من البلكونة، بحيث متتعرضيش لأي تيار هواء أو مياه ساقعة بعد الدش مباشرة.
3- حضري ملابس تقيلة للتدفئة، والأفضل يكون فيها شراب تقيل للقدمين وإيشارب خفيف للرأس أو آيس كاب.
4- عليكي وتدفئة الحمام قبل الاستحمام، افتحي المياه الدافية واقفلي باب الحمام لمدة 5 دقئاق بس، بحيث تتلاشي صدمة السقيع بعد خلع الملابس.
5- احضري كل طلباتك للحمام، الفوطة والملابس والشبشب.
6- نبهي على المنزل بالكامل إن حنفية المطبخ ممنوع استخدامها أثناء الاستحمام علشان متأثرش على سخونية الماء، نفس الأمر ينطبق على حنفية الحمام -لو كان بالمنزل 2 حمام-.
7- ركزي على الغرض من الدش، يعني بلاش تفكير في أمور المنزل وأحوال أولادك وجارتك المزعجة، بلاش مواهب في الغنا أو التمثيل، ركزي إن قدامك 5 دقائق فقط لحمام دافئ ومنعش.
8- قومي بتدفئة المياة بالتدريج حتي تحصلي على درجة سخونة المياه المطلوبة..ونفس الشئ بعد الانتهاء من الاستحمام خفضي درجة حرارة المياه من السخونة العالية للدفء فقط لتهيئة جسمك.
9- خلّي الفوطة في أقرب مكان لإيدك بعد الدش وكذلك الشبشب.
 10- في وقت في المنتصف اسمه -ضريبة الاستحمام- حوالي 60 ثانية بعد الخروج من الدش وحتي ارتداء أول قطعة ملابس، لو نفذتِ الخطوات الأولي مش هتحسي بالبرد أوي لكن ببرد أو قشعريرة خفيف جدًا وطبيعي.
11- بالنسبة لغسيل الشعر، لفّي شعرك كويس بالفوطة وجففيه كويس جدًا جدًا داخل الحمام قبل الخروج.
12- أثناء تجفيف شعرك وبعد ارتداء الملابس، افتحي أي منفذ تهوية قبل الخروج من الحمام، سواء كان الشباك أو الباب علشان صدمة الطقس بين خارج الحمام وداخله. وبكدة تهيئ نفسك.
13- أي مشروب دافئ بعد الاستحمام هيبقي عظيم (ممكن كوباية شاي أخضر أو يانسون، بلاش هوت شوكليت).
14- ادخلي تحت البطانية لحد ما توصلي لدرجة التدفئة اللي كنتِ عليها قبل الدش.
15- أفضل وقت للاستحمام في الشتاء هو قبل النوم مباشرة.
16- نفذي نفس الخطوات أثناء استحمام أطفالك.