الإعلامي المصري الساخر ​باسم يوسف ينقطع عن الأكل لمدة أربعة أيام

كشف الإعلامي المصري الساخر ​باسم يوسف​ عن تركه المأكولات واتباع نظام غذائي يعتمد على المياه فقط، حيث كتب عبر حسابه الخاص على أحد مواقع التواصل الاجتماعي: ده رابع يوم ليا على صيام المياه، يعني أربع أيام من غير أكل تمامًا و كل ما أستهلكه هو المياه فقط، صيام المياه مش شيء جديد أو موضة. ده شيء قديم قدم البشرية، حضارات و مجتمعات و ديانات من قبل الديانات الإبراهيمية اتبعت الصيام مش بس كطقوس روحية و لكن كعلاج.

وأضاف: مؤخرًا في العقود الأخيرة ابتدى النوع ده من الصيام يخضع لتجارب علمية و إكلينيكية. حاليًا في مراكز للصوم في أنحاء مختلفة من العالم أو كجزء من مستشفيات عريقة زي المستشفى الخيري في برلين. التجارب في المراكز دي وضحت دور الصيام في علاج الأمراض المزمنة، الأمراض المناعية و حتى فترة التعافي بعد العلاج من السرطان.

و أردف :مدد الصيام بتتراوح من أسبوعين لتلات أسابيع و بتكون تحت إشراف طبي كامل، أنا جربت فترة أقل كأربع أيام كاختبار ليا .كنوع من اختبار علاقتي بالأكل. معظمنا بيقول إنه ميت من الجوع بعد مجرد كام ساعة من عدم الأكل. الحقيقة ده مش جوع، دي أعراض انسحاب. اللحوم، الألبان، السكر، الزيوت كل دي ليها أثر إدمان فعلاً على المخ و الواحد بيبقى محتاج يلبي طلبات إدمانه من جوعه. على مدى السنتين اللي فاتت كنت يوميًا بامارس الصيام المتقطع. يعني آكل أول وجبة الساعة 12 الظهر و آخر وجبة الساعة 8 بالليل. عشان أحضر للأربع أيام دول ابتديت أقلل عدد ساعات الأكل لستة، أربعة، ساعتين ، ساعة واحدة في اليوم.

 وأضاف :جسمك بيحرق الجلوكوزو الجليكوجين في دمك و كبدك و عضلاتك لمدة 24 ساعة. بعد كده المخ بيدور على مصدر تاني فيتم حرق الدهون . و لذلك ما تستغربش إن الجسم ممكن يقعد فترات طويلة دون أكل لأن الجسم فيه ما يكفي عشان يحافظ على نفسه. الأبحاث أظهرت أن المدد الطويلة للصيام الجسم بيستمد طاقته 90% من الدهون و 10% فقط من البروتين في العضلات.

واستكمل: و ده يفند الادعاءات القديمة أن الجسم بياكل عضلاته. اللي ساعدني في الموضوع ده هو نظام الغذاء اللي باتبعه اللي هو النظام الخضري أو النباتي الخالي من أي منتجات حيوانية حتى الألبان و البيض. النظام النباتي الصحي ده ساعدني كتير جدًا في الفترة اللي فاتت اللي عانيت فيها من إصابات متعددة و جراحتين في الركبة. النظام الخضري أو النباتي ساعدني أني أتغلب على الإصابات دي.

وختم:  في نفس الوقت استمريت في الرياضة و التدريب و ده يثبت أنك “مش محتاج لحمة عشان تبني عضلات” . حتى في خلال الأربع أيام بتاعة صيام المية استمريت في التدريب في الجيم و رفع الأثقال و اليوجا و الجري إلى جانب مهامي اليومية في البيت مع الأسرة أو في شغلي. علاقاتنا بالأكل لازم تتغير. لازم نفتح مخنا لعلاقة جديدة مش مبنية على الإدمان للدهون و اللحوم و الألبان.